【識港網訊】我有一個女仔朋友性格非常好勝，工作上係咁，愛情上都一樣係咁。佢同以前啲男朋友拍拖，鬧交佢永遠都要做贏嗰個，永遠都唔會認輸，每次都要對方先道歉先主動和好。有次明明係佢錯在先，佢都可以反客為主鬧番對方轉頭，最後對方無認錯，兩個人冷戰一星期，要等到對方忍唔住搵番佢先可以完結呢場戰爭。

到最近一次拍拖，拍拖一年幾，期間女仔都同我哋班朋友講咗好多次呢個男仔有好多問題，兩個人係幾唔適合，自己都諗緊仲可唔可以繼續⋯⋯然後近日男仔先提出分手，女仔竟然上演起要生要死戲碼，仲同我哋大呻自己有幾愛呢個男仔，愛到要生要死咁話。但我哋深知，其實佢唔係真係好愛呢個男仔，大概係因為佢唔甘心自己係被撇下一個，唔願意做被飛嘅嗰一位。於是女仔走去纏住個男仔，希望可以令對方回心轉意⋯⋯

愛情，從來都唔係一種比賽，無贏同輸之分。兩個人喺埋一齊，更加唔係競爭對手，而係合作伙伴。不停要喺感情入面分出高低，喺愛情入面搵到贏負，親愛的，那不是愛情。兩個喺埋一齊，就好似一齊經營緊一間公司，賺錢兩個人都賺，蝕錢兩個人一齊賠。如果你將對方當成對手，不停互相搶客，不停鬥營業額，只係喺度磨蝕感情。

廣告都有教：「贏咗場交，輸咗個家，值得咩？」

贏咗一個愛你嘅人，又如何？無獎盃頒畀你，無得寫落CV㗎！愛情裡面有一種好可貴嘅東西叫做讓步。要出盡全力去鬧一場交唔難，要喺兩個人都好激動嘅情況下學識冷靜，然後為對方讓步，先係最難學嘅事。

原文鏈接：http://www.orangenews.hk/officelady/system/2019/02/26/010110776.shtml