【識港網訊】正如我上一篇文咁講，喺疫情期間各大電視台都狂播飲食烹飪節目，依家只要唔係以食物為主嘅show，都應該有人睇。ViuTV喺農曆七月尾趕得切播「靈探」節目《鬼同妳上位》，未播已經有唔少討論。落筆之時已經播咗四集，網上嘅討論度更高，不過係負面多過正面。

非以往靈探節目

未播之前見到主持名單係火火、保錡、七仙羽師傅，都feel到唔係一般靈異節目。第一集開宗名義透過主持同旁白講話「睇靚女、睇身材、睇鬼」、「靚女加靈探冇得輸」，就已經定咗節目嘅基本風格。不過呢三個元素都不致於構成依家一片罵聲。撇開唔討論到底有冇鬼，用最近正式翻生嘅靈探經典節目《怪談》嚟做個對比，可以睇到《鬼同妳上位》有心破舊，但有啲位捉得唔緊（之前《怪談》將以往片段炒埋一碟，我唔當佢係新節目）。

《怪談》同《鬼同妳上位》根本配置一樣：主持+師傅+靈探女主持副手，然後就拍靈探經歷+主持評論+副手講返靈探時嘅感覺。不過方向完全唔同。

(1)主持：《怪談》梁思浩最經典係嗰個擔心樣，連埋幕後人員好似攝影師同導演成日怕靈探者領嘢，次次都叫負責靈探嘅主持副手唔得就立即停，盡顯關懷。火火同保錡就擺到明食花生（真係有兜花生），推啲女參賽者去領嘢。

(2)師傅：有睇開七仙羽師傅上靈異節目，都知佢搞笑啲娛樂性高啲，我諗呢個就係製作組搵佢嘅原因。不過睇返七師傅上其他節目，甚至係上《怪談》，雖然佢表達時好有gimmick，但冇癲到要參賽者擁抱鬼屋主。七師傅喺Facebook明言呢個係節目需要嘅效果，佢只係配合個節目。對比返《怪談》出現嘅師傅，甚至係七師傅本人喺其他節目嘅表現，《鬼同妳上位》擺到明要破咗一向師傅保護大家嘅固有諗法。

(3)靈探者：靈探節目好多時都會塑造靈探者係怕鬼細膽，如果話佢哋大膽到乜都唔驚就好難有嘢睇，幾個人一齊上陣都只少有一個係細膽人士。節目好多時都營造呢啲膽小者為節目而犧生，觀眾就為佢哋擔心，同時塑造陰森氣氛，睇到觀眾戥佢哋擔心，做到又要驚又要睇嘅效果。《鬼同妳上位》第一集就洗大家腦，訪問八位參加者，或明或暗營造佢哋為咗「上位」而參加今次節目，似乎係想引導觀眾向「睇人PK最開心」嘅方向發展。

為收視犧牲自己友都冇所謂？

以上三點係《鬼同妳上位》同以往「一般」靈探節目嘅分別。可惜喺第3點，亦都係塑造呢個節目方向嘅最重要基本位置落唔夠藥，成個節目散晒。

依家節目主持同師傅個定位，我諗到兩個結果：(A) 觀眾覺得啲靈探人士輕浮，佢哋抵死，所以師傅同主持玩佢哋係啱嘅，觀眾企喺主持師傅嗰邊。(B) 觀眾覺得師傅同主持玩啲靈探人士唔啱，觀眾企喺靈探人士嗰邊，落力鬧主持同師傅。依家第3點做得唔夠，營造參加者為咗搏上位不惜一切加入呢個節目嘅力量唔大，觀眾選擇支持八位參加者，情況變成(B)。網上見到觀眾對製作組、主持、師傅一面倒謾罵。不過節目製作組或者覺得搶到收視先係重點，所以犧牲吓主持人（包括自己友保錡、半個自己友火火）都冇乜所謂？

《鬼同妳上位》一心破舊，但暫時收唔到「正面」效果，以負面爭收視暫時成功，成為依家網上重溫第一位（而我覺得咁做係有問題嘅）。依家個節目似足TVB岑應幾年前嘅譁眾取寵式損台格搶收視嘅方法。唔通每個電視台都要經歷呢一個洗禮？要做到冇人睇冇人講先會收手？咁唯有希望觀眾們快啲領悟得到。

橙新闻：https://www.orangenews.hk/officelady/137423.jhtml