【識港網訊】

希望生活中大小事務都順利過關，係人之常情，所以冇乜人鍾意打逆境波，但的確有唔少人擅長打逆境波。更有一大班人鍾意睇人打逆境波時，希望弱勢一方會逆轉勝。以前有朋友睇《龍珠》時成日鬧鳥山明，比達咁努力，點解唔可以畀佢打贏悟空，一次都唔得？我問佢，如果比達真係打得贏悟空，你會唔會咁肉緊，仲會唔會咁鍾意比達？

搞笑熱血感動兼備

15集《ERROR自救TV》，開播前近乎零宣傳，但開播之後就氣勢如虹，得到唔少網民大力支持日日推，唔使幾集時間就成為ViuTV官網最多人睇嘅節目，可喜可賀。節目大部分時間繼續承接之前《花姐ERROR遊1&2》嘅古靈精怪，製作組同埋ERROR四子亦喺呢方面做到不遺餘力，喺搞笑當中一直滲住陣熱血，加埋最後一集嘅總結同真心話，的確令人好感動，睇到眼濕濕。

拍埋去同樣喺首屆《全民造星》參賽而出道嘅MIRROR一比，ERROR樣樣輸蝕：資源少、廣告少、job少，就連喺自己電視台嘅job都唔多。4個成員唔止一次公開呼籲ViuTV加人工。193喺IG發千字文話播完呢個節目就陷入待業狀態。加加埋埋，似唔似比達拎悟空做目標成日想超越佢，但又做唔到嗰種設定？睇緊《ERROR自救TV》時，唔少觀眾包括我在內，成為咗我嗰位戥比達唔抵嘅朋友。

一切都盡在掌握中

觀眾睇得開心，拎到嗰份熱血感動、處於亂世裡劣勢中搵到共鳴。ERROR成功透過今次節目鞏固已有fans之外，亦吸引到一班新支持者。ViuTV有口碑（應該有埋）收視。睇落幾方面都賺咗，唯一有少少負面評價嘅，或者係花姐呢個MIRROR+ERROR嘅「創造者」。

喺MIRROR新歌《IGNITED》嘅Too Hot To Handle Version MV畀鏡粉話鏡頭分配唔公平嘅時候，正係《ERROR自救TV》播緊嘅時候，花姐唔只一次畀ERROR fans投訴，話啲資源去晒MIRROR度。《IGNITED》MV有兩個版本，ERROR就要自己賣tee眾籌拍MV。最終喺《ERROR自救TV》度首播《我們很帥》MV，成品同埋待遇睇落真係差天共地。

上乘逆境波配套

不過我要為花姐平反一下，佢係咪冇理過ERROR？ERROR係咪「冇資源」到咁嘅地步？《ERROR自救TV》有6個導演拍，算係大製作嚟，當中嘅甩漏低質應該係設計好。要做靚個節目唔容易，但要做一個大家接受到佢呈現出嚟係咁low budget，同時賺人熱淚嘅節目，難度就更高。

今次《ERROR自救TV》可以話係打逆境波嘅上乘作品。無論係節目內容設定、實際情況、節目外似乎冇關係但其實有助節目定位嘅事，配合得天衣無縫。當然世事有時就係咁巧合，但又咁講，娛樂節目都係設計好嘅產品。我冇懷疑過ERROR四子嘅真心真性情同努力，今次ViuTV可以喺佢哋真心之上另加設計，將佢哋嘅賣點幾何級數擴大發放，我哋睇得開心，佢哋超額完成，咁就皆大歡喜啦﹗

橙新聞：http://www.orangenews.hk/officelady/system/2020/06/29/010153573.shtml