Twins三場紅館騷口碑滿載。

【識港網訊】「TWINS SPIRIT演唱會」剛完成第三場演唱會，阿Sa（蔡卓妍）與阿嬌（鍾欣潼）昨日終於可以休息一天到25號才再展開接下來的11場演出。近日氣溫驟降只得幾度，但前晚仍無減觀眾熱情， 一開騷觀眾就幾乎全部起身又唱又跳，Twins在台上也答謝大家：「你哋的熱情喺咁凍天氣下，畀到我哋全晚力量，好勁呀！」搞笑的是安歌環節阿Sa不慎咬舌慘被阿嬌笑。

阿嬌與阿Sa互訴衷腸。
Twins前晚不單搞「笑」觀眾，亦同時搞「喊」大家，二人在唱《相愛22年》前互訴心聲，阿Sa對阿嬌說：「親愛嘅鍾欣潼女士，哈哈……多謝你22年來成為我拍檔。我人生最大成就，就係同你成為組合，呢個江山係我哋打返嚟！而無論開心或低潮你都對我不離不棄，陪住我，出面好多人覺得我好醒，其實唔係㗎，我內裏唔係一個非常自信嘅人，好多時你同我一齊，我多咗好多力量，多謝你呀鍾欣潼。」而阿嬌則回話：「認識你22年，我真係冇諗過我哋可以走咁遠，開始嗰陣，出面好多質疑嘅聲音，話我哋好快就冇㗎啦咁，但係我哋喺逆境更齊心，更出面同心對抗，多謝你冇放棄我，我亦冇放棄自己。」現場歌迷即時感動得大叫：「你哋要加油！」而阿Sa亦被感動說：「你係我認識嘅人裏面，個樣最柔弱、內心最堅強嘅人，好多謝你冇放棄自己。」繼而兩人互相擁抱。不少歌迷聽完她們對話，都眼濕濕被感動淚下。

阿Sa搞笑自嘲握手慢

Twins給最佳造型的觀眾送上限量簽名版Sweatshirt。
而在其它環節，Twins兩個都為現場帶來不少歡樂笑料，阿Sa提醒大家，入場記得悉心打扮，扮返Twins以前的造型，每晚她們也會在台上送上演唱會限量簽名版Sweatshirt給最佳造型的觀眾，前晚他們就選了一個四歲小朋友贏得獎品。 到握手環節，阿Sa兩晚都太慢，握到第三首歌完了都未握完四面觀眾，要阿嬌站着等，又經常搞笑大叫：「哎吔，弊啦，我未握晒呀，我好慢呀。」安歌唱《丟架》時，阿Sa突然大叫停，正當大家不知發生什麼事時，原來是她一開口唱就咬到自己條舌頭，要重新唱過，搞到阿嬌狂笑問她：「冇嘢嘛？」而阿Sa除了自己狂笑，不停反問：「喂呀，點解次次咁嘅嘢都發生在我身上㗎，冇理由㗎，我食得咁清， 唔會熱氣㗎。我哋抹走佢重頭來過。」而阿嬌就笑着話，「係抹唔走㗎，哈哈。」兩人表現非常搞笑可愛，為全場帶來歡樂無窮。

關心觀眾要注意保暖

Twins相擁而舞。
阿Sa為阿嬌獻上吻手禮。
阿Sa於台上也關心觀眾要注意保暖：「今日好凍呀，你哋着夠衫？我今朝好似細個返學嗰陣咁，凍到唔想起身，但係返到紅館，一開場感受你哋嘅熱情，真係即刻充滿能量呀。」觀眾即報以超熱烈歡呼聲。

完場後Twins兩人異口同聲說：「Yeah！終於完成三場，可以放假。好想食消夜，好餓，可能係今晚觀眾太熱情，全部都唔鍾意坐低㗎，成晚都企晒身跳舞，我哋都用多咗好多能量呀。」昨日難得小休一天，二人均表示：「跳足三晚，按摩，要按摩呀，哈哈。」