【識港網訊】男團MIRROR自成立以來，兩大人氣王姜濤和盧瀚霆（Anson Lo）的粉絲不時較勁，去年4月更因Anson Lo壓軸表演時，姜糖（姜濤粉絲暱稱）拉隊走而令不和白熱化。日前再爆出機場接機時有神徒（Anson Lo粉絲暱稱）拍片指責姜糖搶手機，令偶像們大表憂心，親身回應。

日前MIRROR12子結束美加巡迴演唱會回港，4月20日清晨抵港獲大批鏡粉蜂擁接機。人多密集自然易起衝突，期間姜糖和神徒兩派粉絲因爭位接機而爭執，更發生肢體碰撞。

12子回港，鏡粉機場守候，姜濤（左）和Anson Lo（右）各有粉絲成功搶霸頭位。（圖：星島）

現場有人拍片並放上網流傳，從片中可見數名姜糖與神徒發生爭位糾紛，疑似姜糖伸手搶奪神徒手機遇反抗：「你放低我部手機！」其他神徒亦指責該名姜糖：「你唔好捉住佢！」、「打人呀！影住你呀！」而該名姜糖即時反駁：「邊有呀！」同時強調：「頭位我哋拎硬啦今次。」

有人拍片放上網公審姜糖，斥責行為「人多蝦人少」。（網上片段截圖）

事件爆出之後，兩位偶像都表示緊張。Anson Lo於翌日4月21日為電影《12怪盜》謝票時接受傳媒訪問，坦言飛機差不多抵達香港時已知悉事件：「當時公司仲了解緊情況，究竟發生過啲咩事，而我自己最擔心係安全問題，任何人我都唔希望有危險，所以第一時間我都係問有冇人受傷，有幾多人受傷。後來知道有人受傷，我就問傷勢點，好擔心大家嘅安全，所有嘢都唔重要，安全最緊要。」

Anson Lo謝票時回應事件，緊張粉絲安全。（圖：星島）

而姜濤昨晚（4月22日）亦在Instagram開直播，回應今次粉絲衝突。直播中姜濤眼泛淚光，語帶哽咽，指事件發展至今聽了很多不同版本，無法考證事實。他提及機上與Anson Lo得悉事件時的反應：「我同佢都唔知點算，有時好灰心……冇諗過會發生呢啲事情，我同阿Lo都冇商量要點做，結果係冇結果，唔知點做。」又為粉絲行為公開道歉：「我有做得唔好嘅地方，我喺度同大家道歉。」

對於他與Anson Lo是敵是友，他坦言有受粉絲之間的糾紛而影響關係，但強調仍然是「好好嘅朋友」：「《造星》到而家我哋都經歷咗好多嘢……我哋係有互相唔理解過，但後尾我哋都知道我哋都係知道大家係緊張我哋、鍚我哋先有咁嘅事發生。」姜濤為此事感到難過，最後祈願今年4月30日的生日願望是，希望大家可以將心比己，互相理解。

姜濤直播表心聲，希望兩派粉絲將心比己，互相理解。（圖：keung_show@Instagram）