【識港網訊】《逆天奇案2》昨晚（8日）一集，復合成功的Nic Sir（黃智賢Ben飾）和Hazel（蔣祖曼Joman飾）關係再有新變化！Nic Sir借意約Hazel到長洲吃海鮮，實質是在船上炮製驚喜求婚。Nic Sir準備好大束鮮花和閃爆求婚戒指，跪地向Hazel求婚，發表愛的宣言：「我哋兜兜轉轉喺呢隻船遇番，我相信係有天意，你唔止係我嘅Special Partner，更加係我嘅Special One，你係我永遠嘅The One，嫁畀我吖！」雖然氣氛非常浪漫，但Hazel卻婉拒Nic Sir求婚，原來Hazel受父母離婚影響對婚姻有恐懼：「我真係冇信心，Sorry。」雖然Nic Sir慘遭Hazel派檸檬，但他未有因而氣餒，更成功氹掂Hazel同居試婚。

黃智賢同蔣祖曼最終關係會點呢？

Ben向Joman浪漫求婚。

船上求婚場口雖然氣氛浪漫，但拍攝過程其實相當辛苦，Joman受訪時透露：「上輯都有拍過船上戲，有咗上次經驗都知道時間比較趕，所以我哋做足準備。當日天氣係超級無敵咁熱，雖然我着到唔係好厚，但我真係好大汗，拍到身水身汗，反而阿Ben佢就好犀利，佢仲要着西裝三件套，但佢真係完全冇汗出，佢話拍古裝拍到已經習慣熱嗰種感覺，話自己冇汗出㗎喇，呢啲真係經驗嚟，我都好希望練到冇汗出！」Joman亦替幕後感到辛苦，她說：「我哋演完戲都話可以用遮遮吓，但係幕後工作人員係唔可以擔遮，最慘係Cam man，逢親拍船嘅嘢佢哋係最辛苦，因為要望住細嘅Mon，佢哋係最易暈船浪，佢哋一日未冧低，我哋都唔可以冧住，好佩服幕後一班工作人員。」

Joman大讚阿Ben好照顧拍檔，同佢合作得好開心同放心。 

講到今輯與Ben再續前緣，Joman直言大家有晒默契：「上輯比較着重Hazel工作上面嘅嘢，今輯嘅重點就喺感情上面，所以同Nic Sir會多啲親密戲，阿Ben不嬲都超級照顧拍檔，無論戲內戲外佢都會幫你諗埋，諗咗你先再諗自己，所以同佢拍嘢係好開心同放心。」Joman續指與Ben很有緣，現在兩人於另一套劇再次合作。另外，劇中打戲連場的Ben在IG上載做Gym相，相中阿Ben半裸大晒爆肌身材，胸肌和腹肌相當結實，完全看不出已年屆56歲，Ben留言：「練的是身體；磨的是鬥志！為新角色裝備自己！」該貼文勁吸逾5,000Likes，並吸引大堆圈中好友楊茜堯、袁偉豪、陳煒等留言，大讚：「勁！」、「嘩Ben 哥哥有料到！」、「勁抽」。

基哥喺劇中收埋6層樓，有報道指佢現實都擁有好多層樓，難怪網友笑言佢戲如人生都係大地主。

昨晚一集另一焦點人物非飾演Nic Sir爸爸福伯的李龍基莫屬，劇情講到他無辜捲入黑社會非法收樓事件，意外爆出福伯原來是大地主，除了自住2個單位和2個舖位外 ，還隱瞞Nic Sir收埋了6個舊樓單位！該場戲播出後引起網友關注，曾有報道指投資有道的基哥名下有7個物業，更有「深圳樓王」之稱，有網友笑言基哥戲如人生，留言：「戲裏戲外都係大地主！」