【識港網訊】羅子溢在近日談論度極高的劇集《婚後事》中飾演潘善仁，演技備受讚賞，更被看好角逐視帝，家中有個視后太太的子溢，不諱言若得獎就更圓滿。向來是「愛妻號」的羅子溢在受訪期間更不時發表愛妻金句，羨煞旁人。

入行十多年，子溢多數是演陽光男孩的角色，這次飾演一個男卑女尊的已婚男潘善仁，劇中周旋於太太Emma（陳自瑤飾）及跟Mira（王敏奕飾）出軌，導致離婚收場，亦因離婚對女兒悅悅（鄭淽月飾）深感愧疚，一段父女情令人動容，恰到好處的演繹，令子溢獲得不少正面評價。對於外界反應好，子溢坦言還是入行多年來第一次，他說：「好多時演員係等一個劇本、角色，當初收到劇本已覺得潘善仁這個角色很有挑戰性，係因為佢嘅感情起伏很大，負擔很重，還有對太太嘅愛，跟着對家庭同小朋友嘅愧疚，亦要面對屋企嘅負擔，最大挑戰係要由30幾歲演至中年，仲有一個18歲囡囡。」

羅子溢強調他拍親熱戲前會跟對手充分溝通。

除了子溢、陳自瑤及王敏奕錯綜複雜的感情戲有追看性之外，子溢與女兒悅悅的父女情亦相當感人，睇到不少觀眾喊濕好幾包紙巾。本身亦有女兒的子溢，對演慈父的角色又是否手到拿來？他說：「如果我無做爸爸只做到基本嘢，但做唔到嗰種不捨、愧疚，因為個女係爸爸心頭肉，拎走我心頭肉那種痛，可能仲要面對個女對自己嘅誤解，其實係為佢好，但喺佢角度係傷害咗佢，真係要做咗爸爸至深切體會到。」也因此他最喜歡講述他主動放棄女兒撫養權的法庭戲，當日是第一日開工拍攝，但他已好投入角色，當上到法庭時，他拿着劇本已好想喊出來，但知道要控制自己的眼淚，到真正拍攝時才可將這個感情流露出來，結果監製林肯亦讚好，對他的演出亦很有信心。

家中事妻話事

現年39歲的子溢覺得現實中的婚姻經歷對他演繹角色有幫助：「我同太太（楊茜堯）結婚都7年了，有兩個小朋友，當中嘅婚姻經歷感同身受，係可放入劇中角色入面，如果無呢段婚姻、冇小朋友，我覺得冇處理得咁細膩咁真。」為了拍出父女情，子溢都會不自覺地將現實生活中對女兒的耐性用在戲中囡囡身上，例如會拍下她、氹她瞓覺。子溢又稱現實中的他跟潘善仁的共通點，就是都對婚姻比較內斂，關於男性自尊的問題未必會跟太太分享，可能事業家庭上的事，男性被默認為一家之主，但他覺得這個觀念要視乎環境，他承認家中的話事人是太太：「因為我覺得家和萬事興，兩個人的關係未必好似拍劇中戲劇化，婚姻中可能為好瑣碎事鬧交，所以我叫老婆小事唔使問我，佢話事得喇，佢OK開心就得。」他笑說：「唔係話怕老婆，而係想老婆開心，總之家和萬事興，老婆開心老公至有運行，（現在有運行？）係！」結婚七年，問子溢可有「七年之癢」？他認為都是睇自己選擇，有沒有回應就要看自己選擇。

劇集講現代婚姻，子溢與陳自瑤（Yoyo）亦有不少夫妻間的親熱場口，他直言事前沒有向太太備案，並反問：「驚啲乜嘢呢？我有時都會反思，我冇嘢好驚，點解要備案？」他又稱太太都是演員，而劇本又不是為搶收視、談論度而拍親密戲份，其實是有需要去豐富劇情，他過得自己的同時，亦相信以太太的資歷及眼光，她一定無問題。他又笑指太太也有睇過他的部分演出，並有簡而精的評價：「我知你點做，做得好，有機。」問到如果要他像同劇的黎諾懿般背部全裸拍出浴戲又可會接受，他笑說：「咁就一定要先問准太太，呢個係尊重，佢OK就OK。」劇中子溢跟「小三」王敏奕在浴室的親熱戲，他笑指自己14歲拍港台劇《Y2K》已認識敏奕，還記得當年敏奕是着住校服前來，大家已有默契，不用太避忌，可放盡去演。

至於同另一位人妻Yoyo演的大膽親熱戲，多年前在電影《婚前試愛》中與周秀娜有大膽床戲的子溢，在這方面就頗有經驗，他先上網找幾套韓劇給Yoyo參考，再叫她揀一首自己喜歡的歌曲在拍攝現場播放，而他就向導演提出盡量清場拍攝，結果出來的效果好好，但最搞笑的是原來大家都走去睇熒幕。有指今次Yoyo是本色演出，子溢認為絕對不是：「Yoyo喺現場都需要好多時間獨處培養情緒，同埋以我認識嘅Yoyo同角色係兩個人，係好理智、帶有少少溫柔嘅女仔。」

直言若稱視帝更圓滿

他又喜孜孜地透露，最開心是收到前輩黃日華的鼓勵短訊，華哥並留言給楊茜堯說：「你老公套戲好好睇，我鍾意佢串連方法，叫佢加油。」還有余安安、張繼聰，能夠得到觀眾及同行認同，令他大感雀躍和興奮。

對於被睇好能憑角色爭奪視帝，子溢亦坦白想得獎：「自己有信心去競選，你話想唔想攞呢個獎？想，因為我老婆亦都攞過最佳女主角，如果我都有機會可以攞到，感覺好完美。」獎項除了計演技，很多時還要講求其他因素，子溢對獎項亦抱隨緣心態，但今次能得到多人讚賞，就算最後沒有獎，在觀眾心目中已有一個分量，這是很重要的。

羅子溢守婚姻承諾盡父母責任　陳自瑤：不是每個人都像你

由「最佳女主持」麥美恩主持的新節目《Mayanne小喇叭》請來熱播話題劇《婚後事》主角羅子溢、陳自瑤（Yoyo）、賴慰玲和黎諾懿做嘉賓，開放討論劇中各種大膽又貼地的話題。

一班《婚後事》主角為麥美恩主持的節目擔任嘉賓。

眾人談到男女對精神出軌及肉體出軌的不同看法，引用Yoyo劇中質問子溢「你同我上床嘅時候有冇諗起佢（第三者）」一幕，羅子溢就用網民的金句回應：「使唔使開埋個腦畀你睇呀。」引得全場爆笑。而諾懿、子溢就與Yoyo和賴慰玲進行正反辯論，子溢在辯論期間大晒「見風轉舵」的真功夫，成功將氣氛推向高峰。之後眾人再探討到父母離婚對小朋友的影響，羅子溢說：「這個問題好值得思考，覺得與其想辦法去解決，不如一開始就不要錯，結了婚就要對婚姻有承諾，做得爸爸媽媽就要盡父母責任。」Yoyo就回應他：「不是每個人都像你一樣的。」