【識港網訊】近期我不約而同見識到幾個朋友身邊嘅女伴都係好唔識趣，例如：會妒忌男朋友同朋友食飯，然後畀說話男朋友聽；男朋友同朋友食飯時會不停打電話嚟；同男朋友一班朋友食飯，全程黑口黑臉，又公主病上身又男朋友一直照顧；仲有一次係男朋友同好耐無見嘅朋友難得食飯，但女仔規定男朋友十一點要番到屋企⋯⋯雖然無人明言，但事後飯局在場嘅每一位朋友都心裡大叫「飛咗佢啦！」

做女朋友，學識通融同識趣係非常非常重要。每個男人都已經有一個阿媽，實在唔需要另一個阿媽。我有時真係好好奇，呢啲女仔係咪覺得控制到個男人係一種成功感？係咪支配對方就可以得到更多安全感？定係純粹幼稚唔識得體貼一下對方？

愛情雖然可貴，但友情都一樣，每個人都應該擁有愛情以外嘅正常社交，你已經佔有咗對方大部分時間，點解唔可以放手畀對方擁有除你之外嘅自由時間？想像你係一條繩，綁喺男朋友頸上，你拉得愈緊嘅下場，只有死路一條。何必做一個咄咄逼人嘅女朋友？

你可以漠視男朋友身邊嘅朋友點睇你，但我可以話你知，刻意與全世界為敵並唔係瀟灑，而係戅居！成為男朋友嘅朋友間一致負評嘅女朋友，我好肯定只會係一件百害而無一利嘅事。

傾少一晚電話，男朋友就會唔愛你咩？你可以擁有閨蜜，點解男朋友唔可以擁有兄弟？放過大家啦，施主。