【識港網訊】喺網上睇到一個咁嘅故事：有個女人今年三十八歲，佢話佢由十五歲開始就知道自己嘅目標係嫁個有錢人，於是一直為此而努力，穿梭喺不同嘅男人之中。最後二十五歲嗰年，成功嫁到一個四十幾歲嘅有錢佬。十三年嘅婚姻，佢覺得自己不曾被愛，今年三十八歲，佢感歎自己未曾得到過愛情，佢問點解自己係被愛情背棄嘅loser。

我好想覆佢：「不如你搞清楚係你放棄愛情先，定係愛情放棄你先。」

人類真係好奇怪，好鍾意將自己當成被害者，不停問個天點解對自己唔公平，但其實好多嘢都係源於自己嘅選擇，你當日選擇咗一條點嘅路，今日你自然會睇到點嘅風景。當你選擇咗嫁畀金錢，你如願以償得到金錢，然後你就開始貪戀愛情？

我成日都話你揀一個人只係睇條件，睇佢有無樓有無車，銀行戶口有幾多個零，無問題，但係條仔自己揀，十年後你窮得只剩下錢時，請唔好喊！唔好喺Facebook鬧你老公唔理你，唔幫你湊仔，唔做家務，唔好喺網上叫春高呼空虛寂寞凍。你當日為咗金錢同條件而放棄愛情，愛情自然都離你九丈遠。你用咩材料去栽種你嘅婚姻，日後你自然會收番咩嘅果。

我明白女人去到三十關口總會有種掙扎，愛情同麵包總係令人矛盾。而作為一個成年人，你只需要對自己嘅選擇負起責任，選擇麵包就好好食飽，唔好奢望麵包餡入面會食到粉紅色嘅戀愛滋味。同樣，選擇愛情就請好好堅持同愛嘅人慢慢等麵包發酵，唔好妒忌旁人口中嘅空氣麵包。

原文鏈接：http://www.orangenews.hk/officelady/system/2019/01/28/010108807.shtml