【識港網訊】Netflix新劇《YOU》入面，有一幕男主角懷疑女主角出軌，衝動之下佢叫女主角畀部電話佢睇，以證明自己係清白。女主角拎咗自己部電話出嚟，然後同佢講「你可以睇，但當你睇咗就證明我哋之間無信任。當無咗信任，我哋就咩都無」

「連信任都失去時，我們什麼都沒有」我好喜歡呢句說話，當兩個人唔再相信對方時，其實仲有走落去嘅價值咩？

由一開始寫愛情專欄時，我己經一而再，再而三咁勸大家，唔好check對方電話！再親密嘅兩個人，如果連呢丁點私隱都無，其實段感情會好容易瓦解，我哋每個人都需要丁點屬於自己嘅空間，屬於自己嘅秘密。無人會希望自己同朋友WhatsApp嘅每一句說話都被看見，無人會想畀人睇到自己瀏覽器上嘅瀏覽記錄，或者係搜尋記錄。雖然無咩唔見得人嘅大秘密，但就係唔想畀其他人睇，就係唔鍾意呢種咁赤裸嘅感覺。

而且更重要嘅一點，維繫一段感情唔係靠毫無保留嘅揭秘，而係靠信任。如果兩個人之間無咗信任，要靠check電話、24小時報備、check定位去獲得安全感，請你說服我，呢段感情有咩繼續落去嘅必要？

就算一個人曾經背叛過你，呃過你，就算對方信用去到負資產，你無辦法得到安全感，你可以選擇離開，而唔係選擇虐人又自虐，成為愛情嘅獄卒，一心一意去監視對方嘅生活。親愛的，那不是愛情。

無論過去你自己經歷咗咩，或者對方做過啲咩，都唔係你用嚟控制對方監視對方嘅藉口。如果一個人無法令你信任，咁我建議你，一係去搵另一個能夠令你信任嘅人；一係好好醫治自己無辦法信人嘅心病。一段無信任嘅愛情，已經唔再係愛情。

原文鏈接：http://www.orangenews.hk/officelady/system/2019/01/21/010108328.shtml