移動版
在這裏認識香港



阿Bob送「女朋友」賀王梓軒
作者:Pearl   來源:橙新聞    2020-06-09 17:17
6月3日是王梓軒的34歲生日,因工作未能返港慶祝的梓軒,早前搞了個線上生日會,有超過十個國家的粉絲朋友參與。

【識港網訊】 6月3日是王梓軒的34歲生日,因工作未能返港慶祝的梓軒,早前搞了個線上生日會,有超過十個國家的粉絲朋友參與。而好友陳煒,更親手造了紅雞蛋兼畫上圖案,隔空送蛋!老友阿Bob更不失搞笑本領,實行隔空「送女」,阿Bob笑指:「梓軒乜都有,係冇女朋友,我將霏霏交俾佢,做佢女朋友……」

因工作未能返港慶祝的梓軒,早前搞了個線上生日會。

為了與一班粉絲朋友有一個好好的互動,身在外地的梓軒,早前想了一個網上生日會的念頭,由構思至舉行都只是幾日時間,梓軒表示:「雖然我身邊係冇人嘅,但係我啱啱開完我第一次嘅線上party,亦都因為疫情嘅關係,大家可以安守家中去參與,我哋跨越咗啲時差、技術上嘅問題……,我哋做咗啲好大型嘅視像會議,真係好大嘅驚喜!」

生日會有過百位粉絲參與。

生日會有過百位粉絲參與,梓軒同粉絲朋友們都身在家中,雖然是線上生日會,但大家都將家中佈置得充滿生日氣氛,梓軒話:「好似真係喺我嘅birthday party現場咁,亦都好多朋友準備咗汽球、蛋糕,又準備咗啲心意,見到大家咁有心,好感動呀!我今年特別鼓勵我所有嘅支持者,唔好送禮物畀我喇!將佢哋嘅心意傳遞俾一啲慈善機構,例如;紅十字會同香港救助兒童會,多謝大家!」

線上生日會,除了有世界各地的粉絲參與外,梓軒多位老友亦拍了短片祝賀,梓軒說:「我好驚喜,我同事冇話畀我聽,偷偷地聯絡咗我幾個好朋友,好多謝Grace王君馨,畀咗個驚喜視頻我,多謝煒哥陳煒,佢送咗隻手工畫嘅蛋畀我,話要返香港先可以領取,但最厚禮就係阿Bob,因為佢個囡囡霏霏,同我差唔多時候生日,佢竟然將12歲嘅囡囡交俾我,做我嘅女朋友,呢份禮物雖然令我好窩心,亦都好感激佢,我諗排到下年都未輪到我去見佢,因為陳國鋒個仔一早已經抽咗籤,我會問準佢呢個競爭對手先。」

工作團隊以及韓國編劇Won Lee為梓軒慶生。

大一歲的梓軒,希望疫情可以盡快過去,經濟復甦,大家健健康康,而工作方面,他將會打開新一頁,梓軒提到:「我自己會繼續去製作一啲影視作品,自己去籌劃,除此之外亦有新嘗試,就係開我第一個網店啦!網店有我嘅專輯,亦都有其他商品去賣,同埋一樣我覺得好重要嘅網上教學,呢段時間令我發現當我哋遇到一啲困難,我哋好需要啲正能量學習嘅機會,所以我就設計一啲健身、音樂同正向思想嘅課程,希望透過網絡平台同啲朋友去分享,再一次多謝大家祝福,我大個仔喇,我會繼續努力!」

而正日當日,工作團隊以及韓國編劇Won Lee為梓軒慶生,工作人員為他準備了一個超級英雄蛋糕,寓意他的作品可以發光發亮,因梓軒首次擔任製作人,希望他的作品可以獲得大家認同。

原文鏈接:http://www.orangenews.hk/officelady/system/2020/06/09/010151769.shtml

责任编辑:syq