來源：橙新聞

【識港網訊】藝人張沛樂（沙律）去年底宣佈回復單身，自言怕孤獨的她卻未急於投入新戀情，寧願花時間等待著陪她走一生的「他」，現在努力為事業打拚，然而對於外界將焦點落在身材上，沙律卻坦言從不知道自己身材好！

想找終身伴侶

常常聽到有人說，忘掉舊愛的最好方法，是投入一段新戀情，張沛樂（沙律）去年11月宣佈與拍拖3年多的林耀聲分手，回復單身的她儘使自認害怕孤獨，卻未有迫切需要迎接愛情：「可以投入到咪投入到囉，其實我覺得好彩唔係啲咩好傷痛或者情傷，分開只係想有更加好嘅自己、將來。」也許逐漸長大，沙律自覺不可再抱喜歡便嘗試一下的心態去拍拖，始終渴望對方會是陪伴自己走一世的人，不過很難在短時間內知道誰是自己的Mr. Right，故沙律直言：「寧願而家識多啲人，專注自己工作，如果去到一個Moment OK嘅話咪OK。」

圈中人或圈外人？

雖然現階段未有開展新戀情的打算，但女生總愛幻想，沙律也不例外，對於選擇圈中人或圈外人作另一半，她亦曾有猶豫：「之前會覺得揀同行，起碼話題上或者理解程度會合拍啲，始終唔係做呢行嘅人唔會理解，特別女仔喺呢行可能要同其他男仔拍嘢，你會介意。但係好矛盾係，如果你揀幕前，調返轉頭可能驚佢唔穩定。」不過沙律坦言想法可以改變，一切看情況而定，若找到個很喜歡的人，就算對方不想她在娛樂圈工作，她直言會看看如何平衡及取捨：「所有嘢變得好快，我覺得專注眼前應該要做既嘢先，將來嘅嘢慢慢會出現，到時會知點決定。」

愛情事業難抉擇

每個人總會經歷選擇題，沙律一方面想為事業衝刺，一方面願意為男友在事業上作出取捨，是否代表她重視愛情大於事業？面對二選一的難題，沙律「崩潰」笑言：「我兩樣都好重視，天秤座有選擇困難，最憎點解呢個世界上樣樣都要二選一，啲男人都想愛情事業兩得意啦！」儘使未能給予確實答案，但她認為此刻會選擇事業，也許將來愛情來臨時會改變想法，而她最希望屆時能取得平衡，兩者能夠兼備。

無意賣身材

外界對於沙律的印象，很多時都停留在好身材這一點，就連近日她為香港開電視拍攝新節目《美少女日本民宿》，網民也期待她騷身材派福利的畫面。無疑身材是個吸睛惹關注的武器之一，但沙律坦言出道以來無意以身材做賣點：「啲人搵我做嘢係因為我嘅工作態度，或者個樣啱做呢類型工作，反而冇諗過身材呢樣嘢，點知啲人一定要定一條路線畀自己？一個人有好多面好多潛能，我唔鍾意人哋畀條路線我，但佢哋覺得我要揀條路線，就算係性感路線都唔係我揀。」

不知自己身材好

沙律續指當初有段時間沒有工作，透過朋友介紹去學打拳，為了不想浪費金錢便經常去運動，後來努力換來成績，便拍攝泳衣照作紀錄，誰知惹來其他人驚訝她原來擁有好身材，但她竟直言從不覺得自己身材出眾：「佢哋話我身材好，乜原來係身材好㗎？其實我唔知，我又冇睇過其他女仔，不嬲都冇比較，由細到大都係望住自己，唔會知咩叫好身材差身材。」

沙律坦言身材成話題後，的確多人認識自己，工作機會亦有增加，可惜當外界將焦點放在身材上，很容易將「沙律」和「身材」掛勾，從而忽略其努力，不過沙律認為沒有必要證明自己並非只剩下身材：「冇得去強求做一啲嘢話畀人聽我唔係我呢樣嘢，以前會好想證明畀人睇，但就算證明又點？有啲人純粹睇表面，人哋嘅諗法好難因為你去做一啲嘢就改變到，或者好畀好長時間去溝通。」

服裝：Ba&sh
場地提供：BKW Party Room(RACING)

原文鏈接：http://www.orangenews.hk/officelady/system/2020/02/11/010139486.shtml