【識港網訊】喺愛情面前，好多人都一心只想搵到個條件最好，最接近「完美」嘅另一半。男嘅就想搵個樣靚身材正，最好仲溫柔體貼，小鳥依人，獨立大方；女嘅就想搵個事業有成，有錢有型，仲要對自己好，細心風趣唔悶。我成日都覺得，你FF咁多條件嘅時候，你又有無諗過自己有幾多條件？愛情都真係需要門當戶對，竹門對竹門，但意思唔係家勢同財力，而係條件上嘅匹配。

身邊有啲女仔成日都話想釣金龜，成日都話邊個有錢有樓，邊個年薪幾十萬，開口埋口都話非金龜不嫁，但個問題係：你自己拎咩做引餌去釣金龜先？你拎你啲貪慕虛榮，港女性格去釣？定係你嘅腦袋空空，真傻真戇居去釣？

又有啲男仔成日都話要溝女神，唔多人追嗰個佢唔溝，但除咗一顆戇直嘅愛，仲有咩？又毒又宅，講句野都鬼鬼祟祟，點溝？我知，野獸都溝到美女，但嗰隻係有錢嘅野獸，你呢？

愛情無可能係不談條件，你愛一個人總有一個原因，可能因為外表，因為性格，因為金錢，對方總有啲條件令你愛上佢。反之亦然，你要吸引到對方，你都一樣要有適當嘅條件。正如上面所講嘅釣魚比喻，你想釣蝦，你都要用蝦想食嘅引餌。你要釣大魚，你就要用大魚想要嘅引餌。如果你只係得釣蝦嘅引餌，就一直喺度等大魚上釣，唔係無可能，世上總會有奇跡，六合彩都有人中囉，你有咁好彩咪得。

假如你無法成為一個美女型男，或者一隻有錢嘅野獸，都懇請你先成為一個性格吸引嘅人類。如果你連性格都無法成為你嘅引餌，咁我祝君好運。

原文鏈接：http://www.orangenews.hk/officelady/system/2018/12/17/010105935.shtml