【識港網訊】今年J.Arie（雷深如）約滿舊公司，轉投以電視電影為主的新公司，正當以為她放棄歌手夢正式轉型成為演員，她卻在今年作出不少音樂上的新嘗試，更獲得外界很大的迴響，最近J.Arie還自資推出新歌《風雨花》，向大家派下定心丸，揚言音樂終歸究底一定是自己首選！

做演員太被動

J.Arie 2013年以歌手身份出道，2015年開始接觸電影拍攝，首部作品《死開啲啦》已擔正做女主角，電影的題材亦經常有突破，今年她約滿舊公司後轉投邵氏，難道她打算專心做演員？ J.Arie解釋演員比歌手更被動，要導演真的看過演員的作品才有機會找他拍戲，機會買少見少：「與其喺出面擔驚受怕唔知有冇工開嘅情況下等機會，倒不如喺一個有瓦遮頭嘅地方等，因為呢邊Keep住有電視劇、電影、綜藝節目，至少好似多咗啲機會。」

音樂是自己首選

然而新公司主打電視電影，J.Arie投放在音樂的時間無疑會減少，不過她坦言音樂終歸究底是自己的首選，而她近年對於「音樂」亦有一種新的體會：「曾經有朋友問過我好哲學性嘅難題，『究竟你係鍾意音樂同唱歌，定係享受做藝人？』，所以我上年開始試過出去秘撈，嗰啲秘撈情況下係冇香港人喺到，全部都係外國人，我唔係想賺錢，純粹係想發掘自己嘅答案。」藉著這些經歷，J.Arie得出的答案是無論台下有沒有觀眾，或者有沒有人理會她唱歌，她同樣在很享受的情況下做這件事：「包括我冇嘢做喺屋企，我都會喺到寫歌，自己唱埋Demo，我發覺自己本身就係好鍾意呢個過程。」

成就他人也高興

當J.Arie了解到「音樂」對她的定義後，她發現歌曲的成績，甚至是否由她主唱都不再是她關心的因素：「我唔係理個結果，或者呢個成就係咪自己攞，反而係覺得如果有機會將呢隻歌面到世，我已經好開心。我之前寫咗歌畀黃淑蔓，佢出咗隻歌同MV，亦擺咗落隻碟嘅時候，我揸住個製成品，見到佢唱我隻歌，唔知點解感覺仲開心過自己出，所以覺得有時候成就人哋都係一件好值得開心嘅事，的確淑蔓今次喺呢隻歌上面成績幾好，獲得兩台冠軍歌，可以成就到佢真係好開心。」

盼大膽做音樂

2019年對於J.Arie來說，除了是事業換上新跑道外，亦做了很多新嘗試，最近她自資推出新歌《風雨花》，更請來不少年輕人合作，帶來全新感覺的雷深如。另外今年3月J.Arie翻唱網絡上一首將港鐵站名串連成歌詞的《逼得香港太緊》意外爆紅，其後與小肥合唱的版本更獲網民激讚，甚至直言香港樂壇欠二人一個交代，J.Arie坦言沒想過有如此大迴響，但不免反思為何自己的歌曲卻不如一首玩味重的網絡改編歌來得有反應，同時激發她在未來日子做音樂時會更大膽。

其實J.Arie往往在電影上有較大的突破，她承認聽過不少留言指她在演戲上的角色比較多新鮮感，她亦有反思為何回歸音樂的時候卻變得保守和多顧忌：「舊時好多歌手都好大膽去講一啲性或者禁忌議題，點解而家冇晒依啲嘢？我反而反思大家係咪應該踏出一步，係咪應該從一啲唔係好傳統嘅角度去做歌呢？有時我發覺自己穩陣同正路得滯連自己都覺得悶，其實中途階段已經有少少咁嘅感覺，好想嘗試衝出去做啲突破，但有時候自己好想好急去做改變，都要成件事配合到先得，好似上年《神奇女俠》個橙頭髮形象同MV半裸男畫面夠爆，但就硬係覺得同音樂未係完全配合。」不過J.Arie認為自從跳出來自己做音樂後，在有恐懼和壓力的情況下，反而令她更加夠膽，認為自己「Nothing to lose」，勇於嘗試做一些未試過的東西。

髮型: Bowie Lo
服裝: Puma
場地提供：BLACK MAXI HOUSE

原文鏈接：http://www.orangenews.hk/officelady/system/2019/10/02/010127860.shtml