【識港網訊】方健儀由昔日的新聞主播輾轉投身自由工作者行列，幾年來試盡各類型的新挑戰，最近還為香港開電視的健康資訊節目《Fit開有條路》擔任主持，每項挑戰都打破外界對她的既有印象。能夠在自由工作者行列中打出一片天，方健儀認為全靠擁有「莊諧並重」的獨特之處。

真性情太遲被發掘

擔任主播期間需要保持專業穩重的形象，讓方健儀被外界定型為「嚴肅」、「正經」，然而轉投自由工作者行列後，不少人驚訝她竟然唱歌拍戲模特兒搞笑辮辮做齊，她也坦言真性情被發掘得有點遲：「以前冇咁嘅平台去表露自己真性格，報新聞冇理由出面天災人禍死人冧樓你仲喺到『哈哈』，一定畀人打畀人投訴，而家有機會做返自己，咪將真性情表露出嚟。」

被邀拍戲以為是騙案

自從另一面被發掘後，方健儀試過不同方面的工作，當中她直言最想意不到會拍戲，更是參與郭富城、梁家輝主演的《寒戰II》，一度令她覺得是個騙局：「對方用好轉折嘅短訊搵我，我諗緊呢個係騙案，都傻嘅搵我拍戲，但傻得嚟我都要試吓佢虛實，問佢有乜對手，跟住佢話對手係梁家輝，我心諗都傻嘅梁家輝點會同我對，但我都決定去睇一睇體驗吓，如果係騙案我咪可以寫一篇故仔去踢爆佢，結果去到係真嘅片場同真係有梁家輝！」方健儀憶述當時她只有4句對白，竟然拍了足足8小時，讓她「大開眼界」，不過她沒有因而嚇怕拍戲，直言若有人有膽量和賞識她，邀請她拍戲的話，她都樂意奉陪。

把心一橫接受每個新挑戰

方健儀無論接受唱歌、拍戲、模特兒行Catwalk等新挑戰，最後都憑出色的表現大獲好評，然而表面自信的背後，原來每次有新的工作邀請她都質疑自己能否勝任：「好似大家知道我識唱歌嘅時候，有一個商場搵我年30晚唱跨年唱到年初一，我都喺到諗我啱唔啱做呢類型嘅嘢，因為呢啲通常都係現役歌手去做。」直到旁人告訴她放棄機會就未必再有下次時，方健儀才決定把心一橫，抱著最後一次的心態去做：「結果就係得嗰一千零一次，之後都未必有人記得我係會唱歌！」不過正因為她抱著這種心態，才令她每每有不同突破。

莊諧並重

方健儀在短短幾年間已成為成功的自由工作者，雖然她謙稱不敢叫自己成功，但認為當中最重要是找到自己獨特的性格，並將這長處加以發揮：「我嘅獨特之處係可以莊諧並重，你要我專業又得搞笑又得，當市面上冇乜呢類人嘅時候咪可以發揮到，呢幾年我可以搵到自己條路，亦幾開心呢條路可以繼續行落去。」

有考慮過生小朋友

方健儀於事業方面發展非常順利，在家庭上她則擁有一段美滿的婚姻，與老公洪楚恆結婚9年一直恩愛，她更樂於做個喜愛撒嬌的小女人。在這幾年二人世界期間，方健儀坦言曾有想過為老公生小朋友：「我老公好鍾意小朋友，每次見到佢抱住朋友嘅小朋友，嗰個慈父樣好唔同，同埋佢有種吸引力令啲小朋友好黐佢，所以我好幾年前曾經覺得佢都值得擁有一個小朋友。」

可惜最後方健儀被名為「現實」的恐懼蓋過生育的念頭，她亦不斷游說老公不要生小朋友，甚至坦言幾年後過了生育年齡就不用再想，儘使現時部分高齡產婦過了50歲仍能生育，她都寧願放棄：「我冇信心在於唔係個個年齡嗰副偈都可以生到，第二係你生完佢出嚟之後仲有好多嘢要跟進，我成日諗如果我50歲真係生到一個出嚟，到我60歲退休年齡佢先得10歲，到時我都跑唔郁，我嘅身體狀況就算生到都未必照顧得好，所以都係唔好搞我！」

原文鏈接：http://www.orangenews.hk/officelady/system/2019/09/10/010126044.shtml