【識港網訊】李麗珍（珍妹）、陳國邦、廖碧兒、袁富華（Ben）日前為ViuTV全新處境喜劇《娛樂風雲》趕工，袁富華透露劇集成為他與昔日好朋友重聚契機：「對方係一個女士，以前嘅好朋友，見到電視有宣傳片，所以傳短訊比我相認，不過就唔好講太多啦，低調啲！我地而家message多，係另類筆友。其實我都想有好成績，所以等監製話好收視，我就會公開泳裝照答謝觀眾，放心一定會找數。」

珍妹就話有好收視時，會效法Ben哥公開泳照多謝Fans，不過呢一刻就專注角色轉變，因為初出場要捱世界，希望劇情去到後半段，可以捱出頭好好享受富貴生活：「我泳照就一定冇問題啦！而家我都叫朋友一定要睇，唔好到我出場時，唔知前文後理。而家都拍咗一半，都好關心仲有幾多集要拍，其實劇組好就我時間，知道我拍得長時間，第二日都會比我開晏少少唞一唞。」

廖碧兒表示而家讀書拍劇兩邊走，每三天往返香港、加拿大：「我而家返嚟三日拍劇，就即刻飛返去四日，一落機就開工，而家機票錢係貴過片酬，唯有喺飛機瞓覺睇劇本。（有冇校園戀愛史發生？）我平時返學都唔化妝，嗰邊啲同學以為我26歲咋，真係好開心，呢個係中國人好處，佢哋唔識睇我哋幾多歲。」

陳國邦就話冇理觀眾反應，專心做好演員的崗位，佢笑指角色造型雖然比較浮誇，不過都未有嚇怕囡囡陳禛：「我哋以前拍古裝、成身血造型，試過收工直接返屋企，佢都見過晒好習慣，知道我同太太係表演事業，所以咩樣喺佢面前，都唔會有咩驚奇。」

原文鏈接：http://www.orangenews.hk/officelady/system/2019/08/02/010122889.shtml