【識港網訊】無綫處境劇《愛．回家之開心速遞》靠著時而貼地，時而浮誇瘋狂的劇情，每每為觀眾帶來無數驚喜，連帶劇中所有角色都有發揮的機會，讓大家看到他們的光芒，其中在劇中飾演清潔工人的「群姐」許思敏，憑一個小角色獲得前所未有的關注，更讓她能與偶像歐陽震華成為其中兩集的主角，圓夢之餘亦一嚐當「女一」的滋味，達到事業的高峰。

沒想過「群姐」會彈起

思敏姐坦言從沒想過角色會如此成功，更表示如今戲份愈重壓力愈大：「我話你聽冇（壓力）就呃你嘅，但都係普通勞動階層嘅工作戲份，我都駕馭得到，不過劇本一路寫一路多咗戲，我都要花啲心機去諗吓點做，記吓啲走位，因為我都唔係好叻記走位。」

聰明傻氣兼備

作為一個清潔工人，卻意外得到大眾的喜愛，定必有其吸引之處，思敏姐認為群姐的魅力點在於聰明和傻氣之間靈活轉換，加上少少孩子氣和天真：「雖然我都係年紀大，但都唔好做到咁老氣橫秋，有少少天真，人哋先覺得你好得意，你都係小人物貪吓小便宜，但又鍾意講吓是非，咁先表達到劇中人物個性，而聰明嘅時候要懶叻，傻嘅時候要冇乜腦筋先有個對比，啲人覺得有趣咁先好睇。」

思敏姐透露拍攝《愛．回家》半年後才體驗到人氣的不同，同時當戲份漸多的時候，便認為自己的角色被觀眾接受，而她亦樂意被大家稱呼做群姐：「有人問過我『我唔識你個名喎，嗌你群姐有冇問題？』，我話梗係冇問題啦，你梗係有睇過劇先知我叫群姐，我仲鍾意呀！個個依家嗌我做群姐，連我個仔有時都嗌我群姐，我同啲仔好似朋友咁，佢同我玩嗌我群姐，我啲孫又成日伊莎Bella群，哈哈！」

大器晚成

如果說「群姐」這個角色是思敏姐的代表作絕不為過，雖然入行逾30年才迎來這次代表作，但她從未覺得這結果來得太遲：「我個仔話『你大器晚成嘛』，有呢個成語嚟形容自己，大器晚成都冇所謂㗎，有時都要觀眾接受，講句俗語啲嘅『天時地利人和』，有時好多角色做得好認真或者好辛苦，但觀眾未必接受，依家觀眾接受梗係好開心，我真係預料唔到。」

茄哩啡變群姐

由無名演員變成現在不少人知曉的「群姐」，思敏姐亦相當感謝《愛．回家》的監製和編劇給予她這個角色：「老實講以前冇人識我嘅，仲有啲唔係咁啱聽嘅說話，話咩『茄哩啡』，但而家就唔會，啲人都好接受我，嗌我做群姐，對我嘅身份坦白講係提升咗。」

後記

整場訪問中思敏姐笑聲不斷，很容易受其笑聲感染，猶如沒有負面情緒，不過她坦言自己活了幾十年當然有不開心的時候，幸好她可以很快忘記，所靠的正是不少女士喜歡的「購物」：「有時會諗得閒去買件衫畀自己，你買衫嘅過程會同售貨員會傾吓偈，咁咪會唔記得嗰件唔開心嘅事囉，又買咗件衫，或者鍾意就買袋，搞到一屋都係衫、鞋、袋，所以女人天生購物狂係冇錯㗎！」

鳴謝：Barry@relaxdearhk
場地：明記潮館

原文鏈接：http://www.orangenews.hk/officelady/system/2019/07/08/010120917.shtml