【識港網訊】近年Super Girls成員各自朝自己的興趣發展，其中陳穎欣（Yanny）選擇了演員這條路，儘使自己喜愛唱歌跳舞，但同時她的內心一直有一個演員夢，渴望外界將她視為一個「演員」。

從入行起已想做演員

Yanny坦言入行後已經很想拍戲，成為一名演員，但不代表比起唱歌跳舞更喜歡演戲，相反她認為這6、7年的時間，大家對於Super Girls的Yanny這個角色已認清楚時，是時候放多點時間在電影方面，讓大家發掘另一面的Yanny：「我好想將演員呢條路，點樣畀大家去定位多啲，令大家視我為一個演員咁看待呢？而家我想努力去做呢樣多啲。」她亦坦言Super Girls的一切經歷令她的人生經歷豐富了不少，對演戲甚有幫助。

自認滿分女友

踏上演員路的Yanny，出演的新劇《仇老爺爺》於ViuTV熱播，劇中飾演游學修女友的她透露角色是個真．女神和滿分女友，當與男友玩的時候可以玩到很瘋狂，但當對方跌倒或軟弱時又會堅強地扶起對方，Yanny坦言這個角色與自己性格相似，更自認是「超班」女友：「我成日整蠱男朋友好多嘢，例如睇戲食爆谷，我餵到咁上下會換廁紙畀佢食，或者我成日可能整親少少，就會演一場好大嘅戲，同埋會迫佢陪我做好多唔同嘅戲。」

渴望演夢幻愛情戲

不少藝人被問到想演出什麼類型的角色時，都會回答精神病人、殺人犯等具挑戰性的角色，不過Yanny卻剛剛相反，想演青春偶像劇：「我一直好渴望做一種角色，就係《流星花園》嘅杉菜，即係好希望全部靚仔都係鍾意我，然後我就覺得慢慢揀。」她認為在《仇老爺爺》入面與游學修的愛情只屬於平常人的愛情，不算轟烈，然而偶像劇的那種情節很夢幻，故渴望嘗試夢幻的愛情：「其實我冇諗過自己係呢啲人嚟，但我覺得年紀愈成長嘅時候我愈喜歡夢幻嘅情節，即係製造多啲浪漫，我覺得生活會開心啲。」至於與她經歷這段「轟烈愛情」的對象，Yanny坦言希望是老闆古天樂：「除咗劉青雲外我好鍾意佢，同埋我而家入咗佢公司，仲唔係機會？希望可以有一次合作機會！」

踩過界做餐廳老闆

現時Yanny的身份不止是Super Girls的Yanny，以及演員陳穎欣，最近還多了一個名銜叫餐廳老闆，她投資6位數與朋友合資開餐廳，除了她本身喜歡美食，加上自幼家中開茶餐廳，而受到那種氛圍影響想擁有自己的餐廳外，娛樂圈的不穩定因素亦成為Yanny創業的原因：「因為我覺得娛樂圈工作算係被動，好多時候都係等待一啲機會，但我真係腳踏實地實幹去做生意，好似睇到多啲嘢，有更大嘅安全感。」

與一般餐廳不同，Yanny這間餐廳特別設有打小人服務，還真的邀請了鵝頸橋打小人的姐姐坐陣，為求幫大家驅走惡運，抒發壓力，而Yanny亦希望這種香港文化能宣揚出去：「其實我好希望旅客嚟到會想見識吓，因為我覺得打小人係好香港嘅嘢，好想將呢個文化畀人睇到多啲之餘，希望呢間餐廳可以宣揚快樂，嚟到嘅人可以將自己嘅壓力放低，然後笑住咁樣走。」

服裝：Initial
場地提供：圍威喂

原文鏈接：http://www.orangenews.hk/officelady/system/2019/07/15/010121449.shtml