【識港網訊】無綫處境劇《愛．回家之開心速遞》一直獲得網民一致激讚，不過近排卻出現唔少網民畀負評，皆因之前講到池美麗（鍾凱琪飾）單戀安仔（周嘉洛飾），決心介入安仔同Bonnie（林凱恩飾）嘅感情，已經令唔少人頂唔順，兼揚言要棄劇，甚至走到鍾凱琪嘅社交網留言鬧爆！

雖然安美戀不獲「祝福」，但編劇似乎睇唔到網民嘅訴求，繼續為安美戀加戲份，噚晚一集更幫佢哋上演一場長達20秒嘅鴛鴦戲水情節，大玩泡泡浴！就算今集安仔再度賣肉，可惜同佢共浴嘅係美麗，搞到唔少網民都覺得「那畫面太『重口味』我不敢看」，紛紛留言話頂唔順，仲話呢幕係「安仔演藝生涯最黑暗嘅20秒」！

至於飾演池美麗嘅鍾凱琪經過上次畀網民鬧爆後，喺噚晚一集播出前都似乎有晒心理準備，噚日喺社交網留言：「假如上一次係畀人唾罵，今晚應該會畀人鞭屍，不過點都係一句，你想鬧嘅。麻煩今晚開著部電視睇咗先！」

原文鏈接：http://www.orangenews.hk/officelady/system/2019/05/30/010117900.shtml