【識港網訊】關智斌（Kenny）近日（5日）宣布開演唱會，近日（6日）就已經心思到英皇珠寶「掃金」旺一旺，更想施展「屈金大法」搏老闆楊受成送禮，怎料老闆竟然快他一步，一早準備了一隻「一帆風順」金帆船等他，Kenny即刻開心到彈起兼自爆：「我仲諗住屈佢㗎！」

Kenny笑到四萬咁口自爆整個「屈金計劃」：「我頭先特登打俾老闆秘書，問老闆會唔會巡舖，諗住捕住佢，等我有折頭或者屈嚇佢送嘢嘛！」結果真的被他捕獲，楊受成一入舖見他「先係嚇一跳，然後得啖笑」說：「我有嘢送俾你呀！」Kenny即刻呆咗：「嚇？我仲諗住屈你喎老闆！」老闆隨即着同事拿出預先訂製的金帆船，Kenny即興奮：「真係㗎？多謝呀老闆！我仲諗住要出招㖭！」

自言是「八卦仔」的Kenny直言最近迷上「擺金陣」，「話要多啲金嘛！我諗住錄音室、化妝間全部擺金！」楊老闆一句「啲金好貴喎，你條友仔」笑爆全場。Kenny又雄心壯志地說：「我而家目標好明確，做好個Show，下次再開就可以收多啲金……同埋錶！」更笑指這是員工福利。楊老闆為Kenny打氣期間，突然爆句：「聽講你個『波霸』好犀利！」Kenny即急急澄清：「個Body吖嘛！到時Show俾你睇。」嚇到老闆耍手擰頭。最後楊老闆贈句「一票難求！一帆風順！」力撐，Kenny即冧爆話：「我會努力！爭氣！」

臨走前，Kenny得意洋洋謂：「任務達成！搶咗嚿金返嚟……呀，唔係搶，係老闆送嘅！」至於怎樣報答老闆士？Kenny稱必定全力以赴，瞓身做好個Show：「咁就可以再收多啲金！」