【試港網訊】梁朝偉、洪金寶、許鞍華、阮兆輝獲香港演藝學院頒授榮譽博士，頒授典禮於昨日（5日）在香港演藝學院舉行。

梁朝偉繼上月獲科大頒發榮譽博士後，再獲演藝學院頒發榮譽博士，被問及感受，他說：「好似畢業咁，好開心。（如何慶祝？）食飯。（今年係攞獎年？）又唔算，之前電影都試過。」他又指沒有點算過屋企有多少個獎項。

雙博士的梁朝偉被問到可會教學分享經驗？他說：「其實有人邀請我，但我只識得演戲，唔識得教書，暫時唔會做，分享經驗就可以。（會唔會讀書？）其實拍戲就等於讀書，因為每個色都要好多準備，要睇好多書。（想再攞博士？）已經好滿足，下一個目標係想做監製，我還會演出，希望明年冬天可以成事。而導演就先賣個關子。（是枝裕和這一套？）唔係，嗰套係上年嘅，係一套藝術片，但係劇本到依家都未寫好。我監製的是部動作劇情片，講父女題材。我未定在日本還是韓國拍，會先定了地點才找演員，因我想拍一套亞洲電影。」

對於洪金寶心願想再做導演，兩人會否有合作機會？梁朝偉笑說：「當然想，但怕請他不起，大哥拍打戲真的好勁，有他拍我就不用打。」談到電影《破·地獄》票房破億，他指已觀看了，並大讚電影很好看，他很開心香港電影多人關注，成績比西片更好，希望可以持續下去。

洪金寶獲榮譽博士，獲一家人到場祝賀。他直言沒想過人生中可以成為博士。快將生日的他可會覺得是最好的生日禮物？他說：「冇諗過，我淨係諗可以食乜，屋企人唔畀我食蛋糕，就算買蛋糕都係買啲啱我食嘅，嗰啲唔好食。」

洪金寶除了太太高麗虹陪伴，仔女包括兒子洪天明、媳婦周家蔚與兩個孫仔也到場支持，他說：「是老婆畀我驚喜，事前唔知佢哋返晒嚟。（成為孫仔榜樣？）遲啲話畀佢哋知，爺爺有幾威，希望佢哋畀心機讀書。」他直言心願想再做導演並獲「最佳導演」獎，若成功他人生就很圓滿了。