【識港網訊】日本男星木村拓哉雖然入行廿幾年，但人氣冇被一班後輩蓋過，一直深受各地粉絲歡迎，上年年尾木村特意開咗個微博帳號同內地粉絲互動，仲不時用中文留言，相當有誠意，至今已經有138萬多粉絲追蹤！

噚日（1號）木村再次更新微博，晒出一張Chok爆嘅全身照，原來係為咗認證台灣歌手羅志祥（小豬）送出嘅禮物！小豬向來都係木村嘅頭號粉絲，近排仲特登送咗件T恤畀偶像，而木村收到禮物後都即時着上身，並留言：「羅志祥留了禮物給我～！我已經在穿哦～！非常感謝！」至於小豬得知偶像認證自己送的禮物，都忍唔住化身「粉絲Mode」，喺微博興奮留言嗌爽：「唉呀媽呀，我好爽啊，希望您喜歡。」

粉絲向來最希望偶像能夠用上自己送贈嘅禮物，如今木村特登公開認證禮物，難怪小豬會咁激動嘅！

原文鏈接：http://www.orangenews.hk/officelady/system/2019/05/02/010115699.shtml