【識港網訊】藝人黃心穎同許志安偷食一事，除咗對雙方嘅另一半造成傷害外，仲有唔少人無辜受到影響，好似蔡一智因為同心穎生得似樣，導致事件發生後佢嘅社交網被人洗版惡搞；張振朗主演嘅兩套劇集《堅離地愛堅離地》同《牛下女高音》都因為心穎嘅關係隨時播映無期，最近再疑似有新嘅受害者出現，竟然係麥美恩（Mayanne）嘅媽咪？

話說心穎同Mayanne一樣喺加拿大長大，同樣係港姐出身，甚至一齊拍攝《學是學非》，而麥媽媽曾經喺無綫節目《星星探親團》亮相，唔少當地華人都知佢有個明星女兒，不過可能因為心穎同Mayanne有咁多共同點，搞到唔少人搞錯咗，認錯麥媽媽係黃媽媽，連累佢被街坊指指點點，甚至投以奇異目光。

至於Mayanne回應傳媒有關媽咪被點錯相一事，就話相信只係誤會，又笑言帶媽咪多啲出嚟見大家就唔會被認錯，仲話媽咪「肥嘟嘟、好師奶、好易認」添！

原文鏈接：http://www.orangenews.hk/officelady/system/2019/04/29/010115504.shtml