【識港網訊】拍拖嘅時候總係唔少得甜言蜜語，但切記！甜言蜜語只係甜言蜜語，信一半都畀多佢啦。睇一個人要用眼睇佢做嘅事，而唔係只用耳聽佢講佢幾愛你，為你做咗幾多事。

因為呢個世界有一種人，無野叻，把口最叻。佢總係講到自己幾愛你，為你犧牲咗幾多，有幾委屈，有幾無私。而事實可能係，佢所謂嘅「出盡全力100%無私嘅愛」，根本同事實相差幾皮。

有個認識嘅男仔就係咁，佢成日都話自己幾愛女朋友，為女朋友做咗幾多野，山盟海誓，至死不渝嗰種。但去到個女朋友媽媽病咗，要入醫院住，男仔不停埋怨：「點解日日都要我去探？我探完又唔會好番」。雖然佢真係唔係醫生，探下唔會病好。但係一個人嘅真心喺呢啲時候就會表露無遺。平時講到幾愛個女仔，但係個女仔屋企一有事嘅時候，呢個男仔已經想逃跑。

有時候，呢種突發嘅「麻煩事」往往令你睇清楚一個人。一個愛你嘅人並唔係日日講我愛你，而係當你同你嘅家人需要幫助嘅時候，佢會義不容辭伸出雙手。

結婚前請好好用心從呢啲小事中睇清楚一個人，如果一個人永遠喺你需要幫手時缺席，喺你低潮傷心時逃走，喺你家人有需要時逃避，永遠搵到藉口畀自己，咁你要放心，因為結咗婚之後佢都會一樣。佢對你嘅「愛」只限於風平浪靜之時，而係危難嘅時候，佢嘅「愛」首先留咗畀自己。

用心睇人，以後你會發現人生會易行好多。

原文鏈接：http://www.orangenews.hk/officelady/system/2019/04/15/010114447.shtml