【識港網訊】張學友睽違5年舉行的「張學友60+巡迴演唱會」香港站，前晚（10日）在紅館啟航，並創新的糅合管弦樂、流行樂和現代芭蕾舞於一身。今次是學友第10次個人演唱會，亦是是次巡演的第67場；學友不單止在台上展現一字馬 ，更承諾70+歲仍繼續唱，目標打破胡楓紀錄，90歲仲開演唱會。曾志偉、陳慧嫻、莫華倫、王冰冰等到場支持。

學友在巨型LED熒幕投放出立體的海浪影像下，若隱若現地演唱《留住這時光》為當晚的演出揭幕。又特別花心思的在《我應該》一曲中加插了吹口哨，及於《等你等到我心痛》歌曲中播放了他與舒淇和金燕玲拍攝的劇情片段，增添現場視聽效果。

學友化身天鵝湖中的白馬王子。
秀一字馬約定開70+個唱

連番跳唱後；學友跟大家打招呼：「大家好嗎？山頂嘅朋友好嗎？每次嚟到紅館唔講呢句唔舒服。今次香港場演唱會兩日休一日，其實經過精密計算，咁樣安排係最好。今日係巡迴演唱會第67場，返到嚟香港冇咁緊張，但始終有一種壓力。因為第一次做三面台咁近距離，好想伸手同大家握手。另外一個緊張係，好多朋友睇住我大，60+係一個乜嘢概念？開完半世紀演唱會，今次再開60+演唱會，眨吓眼就已經到咗60歲。」其後，學友突然即席在台上表演一字馬，「首先，我喺屋企試一試60歲都仲可以做到(一字馬)，開始冇咁驚去諗，我係咪可以開到一個60+演唱會？今次開到非常之開心。今次我係夢想成真，希望大家唔好放棄自己夢想，原來係得嘅！我𠵱家仲諗緊係咪可以開70+演唱會，唔知得唔得㗎，我會一路拉筋。如果大家覺得今晚睇完，下次都仲會睇嘅話，我嘅目標係打破修哥（胡楓）紀錄，90歲仲開演唱會。希望我到90歲嘅時候仍然可以攞住支咪唱。不如喺度做個約定，如果我可以開到70+演唱會，你哋都要好好保持自己身體健康，7年後再喺呢度見面。」

張學友深情演繹金曲。
學友透露自己由1984年開始入行，1987年開第一個演唱會，到今次已是第10個演唱會，所以這次想帶一些特別的創作和音樂給大家欣賞，因此有了這個集合管弦樂、流行樂和現代芭蕾舞於一身的演唱會，並由音樂總監吳慶隆帶領 53人樂隊帶給大家難忘的一夜。其後，學友表示近年都有推出新歌，包括《日出時讓街燈安睡》和《又十年》，更在熒幕上呈現出學友逐漸變老的樣子。及後，當學友唱出《愛是永恒》時，台上呈現壯觀靚麗的煙火。最後在安歌部分唱出《李香蘭》和《她來聽我的演唱會》，獲全場歡呼。學友坦言：「其實我好驚，我驚我遞mic出嚟冇人唱，唔知係咪因為今次三面台大家坐得好近，你哋唱得特別大聲。我係1985年出第一隻唱片，到1990年大家聽到《每天愛你多一些》才更加認識我。」然後，全場大合唱《每天愛你多一些》，學友既開心又感動，最後以一曲《吻別》為「張學友60+巡迴演唱會」香港站畫上圓滿的句號。