【識港網訊】無綫處境劇《愛．回家之開心速遞》嘅蠢人代表，向來都係Terry（李偉健飾）同金城安（周嘉洛飾）之爭，不過呢個「比試」似乎已經有咗結果，皆因Terry經已變返聰明，甚至可以食住家姐龍力蓮（林淑敏飾）！

話說前晚同噚晚兩集都係講Terry變天才，劇情講到Terry為咗變聰明，不惜去試吓針灸，點知過程中畀強勁電流擊中，令到佢變返一個聰明仔，不過Terry變醒後連以前擁有嘅善良都一齊消失，搶咗哥哥龍力士（鄭世豪飾）做嘅計劃書，更反指係對方偷咗，搞到大龍生打龍力士入冷宮！

及後龍力士同Jenny（陳偉琪飾）懷疑Terry係另一人假扮，想撬開佢嘅車攞DNA驗，點知未做已經畀龍力蓮同KC（歐瑞偉飾）踢爆，正當龍力蓮同KC想將消息話畀Terry知，等佢一齊恥笑之際，Terry用返龍力蓮嘅金句「你真係蠢，唔係扮㗎喎」鬧龍力蓮，仲話如果有撬車嘅片，就可以屈佢哋喺架車裝追蹤器，再搵人做場戲綁架自己，到時可以屈到佢哋坐監添！

不過龍力蓮同KC都無意搞到對方坐監，點知畀Terry再鬧：「婦人之仁，唔怪得之爸爸睇唔起你呢啲女人，真係唔係做大事！」最後仲串到龍力蓮同KC冇聲出，默默走出辦公室，重點係連佢間房都畀Terry搶埋！

唔少網民睇完呢集後都大讚有驚喜，皆因大家都認為Terry醒不過一集，點知依家唔止冇將Terry變返蠢，反而更將佢成功黑化，網民都話好有新鮮感，仲心心眼表示Terry好型，仲激讚Terry用大小姐嘅金句鬧返大小姐好正。同時李偉健向來畀人感覺都係戲麻麻，不過今次「黑化」後演技獲唔少網民大讚，話無論低能定係奸佢都演繹得好好，有好大進步！

原文鏈接：http://www.orangenews.hk/officelady/system/2019/04/10/010114092.shtml