【識港網訊】近排要數到無綫處境劇《愛．回家之開心速遞》最受歡迎嘅配角，伊莎貝拉．群（許思敏飾）定必榜上有名，特別係佢前排當眾展現佢嘅白滑胴體後，更係令人難以忘懷！如果大家有留意開群姐，都會知道佢係歐陽波比（即歐陽震華）嘅鐵粉，仲要唔止一次公開表達對對方嘅愛，搞到好多人都希望歐陽震華能夠客串一集，一圓群姐嘅心願，而呢個願望或者能夠實現？

事緣編審李綺華噚日喺社交網晒出一張歐陽震華嘅相，仲留言：「歐陽波比大駕光臨 #愛回家之開心速遞#」相入面則見到歐陽震華喺海報上面簽名，聽聞呢張海報係有劇組人員貼喺辦公室，並叫有份參與《開心速遞》嘅人員喺上面簽名，如今歐陽震華入電視城並且喺海報上面簽名，莫非劇組真係邀請到歐陽震華客串？

唔少網民見到呢張相，表現得比群姐更激動，直言要集氣推到群姐可以見到偶像，睇嚟大家都好想幫群姐圓夢喎！

原文鏈接：http://www.orangenews.hk/officelady/system/2019/03/29/010113297.shtml