【識港網訊】前排歌手鄧紫棋（G.E.M.）宣布同合作11年嘅蜂鳥音樂解約，其後有人發現蜂鳥音樂喺2015年成功註冊咗「鄧紫棋」嘅商標，而英文名「G.E.M.」亦喺香港註咗冊，換言之G.E.M.解約後隨時要改名或者用返原名鄧詩穎先可以繼續活動。其實公司為藝人嘅藝名申請商標都屬正常，但喺韓國卻出現連藝人本名都被申請商標專利嘅情況！

據韓媒報道，人氣限定男團Wanna One出身嘅成員尹智聖所屬嘅LM娛樂，最近為尹智聖嘅英文本名「YOON JISUNG」申請商標專利權。根據網上嘅申請顯示，LM娛樂於2月12日申請有關專利，種類包括CD及DVD產品、演藝娛樂產業等共7個商標權。至於LM娛樂回應傳媒時承認已就尹智聖嘅英文名「YOON JISUNG」向韓國專利廳申請商標專利。

據了解，雖然公司有權申請藝人嘅名，但實際申請嘅情況好少，公司呢個舉動可以被視為約束藝人嘅自由演藝活動，好似MBK娛樂喺女團T-ara嘅合約到期嗰陣申請「T-ara」商標專利，令成員完約後唔可以繼續以「T-ara」嘅名活動。所以如果LM娛樂成功申請，日後尹智聖要轉公司嘅話，使用自己個名嗰陣會造成不便。

至於LM娛樂呢個做法，引起唔少粉絲嘅不滿，粉絲認為公司註冊藝人嘅本名太莫名其妙，公司憑乜嘢註冊父母給予尹智聖嘅名。

原文鏈接：http://www.orangenews.hk/officelady/system/2019/03/18/010112421.shtml