【識港網訊】昨日(19日)是父親節，有網民分享爸爸出街做尷尬行為的經歷，指自己過往經常嫌棄他，今年欲與他慶祝父親節，爸爸上月卻突然離世了，樓主後悔自己無好好關心他。網友紛紛指帖文有洋蔥，有人直言「笑笑下睇到想喊」，祝願樓主要好好過生活。

愛搞爛gag

樓主回憶，自己有次帶女朋友回家，「一開門，我老豆就勁大聲喝住我女朋友，問佢做咩收埋把刀喺身」。女朋友立刻嚇壞，舉高雙手回答：無啊Uncle……「我老豆先笑住講：少女藏刀啊嘛！」

另外還有一次，爸爸與樓主的家姐男朋友飲茶閒話家常期間，爸爸問家姐男朋友從事甚麼職業，對方回答剛剛畢業。「聽完我老豆就好認真咁細細聲問佢：你好人好姐點解要走去做賊啊仔？我家姐男朋友呆咗，唔知畀咩反應。之後我老豆一臉正經咁同佢講：你偷左我女個心啊嘛！」

與陌生人搭訕

樓主繼續分享與爸爸的往事，「有次同佢去食Pizza Hut，食完佢捉住𡃁妹Part Time職員，問人哋打唔打乒乓波。」樓主更附上父親手握薄餅木板的相片，狀甚似握著乒乓波球拍一樣。

失去才懂珍惜

樓主表示自己以前覺得與爸爸出街好尷尬，經常嫌棄他。但到父親離世，就有感不孝，「無好好關心佢，無多啲陪佢，無同佢影多啲相留低回憶，而家連同佢講父親節快樂嘅機會都無了……」他寄語網友要多點陪伴和關心家人，不要好像他一樣失去後才懂珍惜。

不少網友直言好感動，鼓勵樓主振作好好生活，留言：「爸爸在天之靈一定好欣慰」、「啲爛gag可能對樓主阿媽嚟講係一生難忘嘅回憶」、「我老豆都係鐘意搞笑！多謝樓主提醒，我今晚會同佢食飯！」

圖：lihkg討論區