姜濤早前推出個人紀錄片《答案》，而最後一集《答案 最終章》昨晚播出，片段一開始先播出姜濤接受訪問的片段，他說自己不喜歡「姜B」這個名字，就連「姜濤」這個名字都太喜歡，更曾向經理人花姐（黃慧君）提出可否改名，可惜想改時已經太遲。接住播出姜濤憑《Dear My Friend》奪得「叱咤樂壇我最喜愛的歌曲」的片段，姜濤表白感受：「可能人哋睇我喺好高峰位置，其實我真係跌得好低，可能你睇嘅嘢真係相反，可能你睇到嗰個人嘅表面同佢內心所想嘅完全相反，所以千萬唔好太容易定義一個人，冇人定義到。」

之後姜濤與友人一起搭港鐵及電車、行商場，再回到母校青年學院（邱子文），他在禮堂回憶說：「冇呀，嚟返呢間學校探番以前嘅人，呢度算係我第一次表演嘅舞台，嗰陣時同啲朋友，參加一啲表演同歌唱比賽，嗰時上呢個台好緊張，都唔知點解咁緊張！」他又提到當年因為肥胖，上游泳堂時不會脫衣服，見到其他學生跑步，自己會感到自卑。

姜濤說：「我所有嘅自卑、童年嘅唔自信，都係來自呢間學校，我唔係話呢間學校唔好，純粹係我喺呢度經歷嘅所有嘢，喺呢度愈自卑、愈唔懂事，大個先愈嚟愈變得懂事，我嗰陣太肥，每次學校有游水堂，我都會企喺泳池隔離，唔會除衫，嗰陣時每日跑步都會望住啲學生，跟住覺得好自卑，以前我就成日喺度射波（打籃球）！」

之後姜濤解構新歌《鏡中鏡》，他說：「開頭做呢隻歌係想表達自己逃避及反抗，本身想反擊人，想啲人唔好再咁樣睇我，但諗諗吓又覺得冇乜嘢意義，我出完又點呢，要搵個方法令自己堅強啲，承認自己有呢啲唔好嘅聲音喺內心，諗方法同佢一齊行，其實個答案已經知係乜嘢，好似好多道理大家都知，但真正做到個道理要你做嘅事，都要經歷好長嘅時間，起碼我搵到個方向，知道邊條係啱嘅路，拍完呢個紀錄片，出完呢隻歌，都會有唔開心嘅時候，但起碼我知道有個方法，我希望大家聽完一次，你搵到自己嘅答案就唔使再聽，你聽多兩次，你搵唔到答案就繼續聽落去，咁就最好，哈哈哈！」

原文鏈接：https://m.orangenews.hk/details?recommendId=1136101