【識港網訊】藝人陳松伶繼2017年回巢拍攝無綫劇集《全職沒女》後，終於喺今年再次推出新作《福爾摩師奶》，新劇喺今個星期一首播，網民除咗話松松姐姐個凍齡樣依舊省鏡，同埋大讚佢演繹落難嗰陣嘅演技出色外，唔少人更加留意松松姐姐為劇集演唱嘅插曲《有我便有你》，仲話呢首歌應該做主題曲添！

松松姐姐嘅唱功獲得外界嘅認可，而佢對上一次演唱無綫劇集歌曲已經喺2005年嗰陣，為《驚艷一槍》獻唱《真相》、《夢蝶》同埋《情傷》，所以今次佢相隔14年再度開金口唱無綫劇集歌，令好多人都相當期待，至於歌曲推出後，獲得唔少網民喺網上留言力撐，指歌曲係高水準之作，仲話松松姐姐嘅歌聲獨特得嚟更有種韻味。

不過依家絕大部分嘅劇集主題曲都由星夢歌手玩晒，今次《福爾摩師奶》都唔例外，由吳若希演唱主題曲《暗中愛我》，此舉令好多網民戥松松姐姐唔抵，認為無論歌曲定演唱者，《有我便有你》都比《暗中愛我》出色，更應成為劇集主題曲。

原文鏈接：http://www.orangenews.hk/officelady/system/2019/03/01/010111159.shtml