【識港網訊】新晉搞笑男子組合ERROR今日出席活動，四位成員都唔係擅長唱歌嘅佢哋竟然大唱天王黎明首《眼睛想旅行》，仲現場自製Auto Tune，即刻令到現場氣氛勁熱烈，台下觀眾都睇得好開心！

ERROR一向以搞笑見稱，今日出席完活動後佢哋喺Facebook 出Post：「今日ViuTV請我哋做《敢創意宣傳》嘅宇宙級高潮嘉賓，成場有咁多大老細等住搵我哋落廣告，我哋四個顏值就唔駛再多講，仲要咁有氣質，真係乜嘢廣告都carry到！今年應該有排忙！」仲Tag自己做「內置人肉autotune」、「廣告界新寵兒」同埋「豬年宇宙級天團」，認真搞笑。

睇返佢哋表演，雖然都有甩Beat，亦唔算唱得好好聽，但係就氣氛搭夠。最搞笑一定係193跳嘅騎呢舞，保錡作狀話佢跳得唔好，即刻自己跳返，估唔到佢都跳得有紋有路喎，ERROR仲好識做同台下觀眾互動添！

網友睇完就話好正，又有人話佢哋係廣告最佳人選，果然深受網友喜愛。ERROR每次出現都令人好開心，希望如佢哋自己所言真係做到「廣告界新寵兒」，到時相信花姐一定好安慰！

原文鏈接：http://www.orangenews.hk/officelady/system/2019/02/28/010111051.shtml