【識港網訊】無綫處境劇《愛．回家之開心速遞》自從前排有George（張明偉飾）同池子孝（阮政峰飾）誤打誤撞「出櫃」，成為劇集第一對公開嘅男男CP後，唔少網民都希望朱凌凌（吳偉豪飾）同金城安（周嘉洛飾）呢一對可以「修成正果」。而喺噚晚播出嘅一集，講到凌安CP有「第三者」介入，搞到安仔呷晒醋，變咗做「醋男子」！

話說劇情講到澳門大學電影學會會長氹仔（陳戩浩飾）嚟咗香港搵安仔佢哋交流，點知佢同朱凌凌一拍即合，朱凌凌更因而冷落咗安仔，搞到安仔即刻變咗醋埕，仲畀熊樹根（劉丹飾）話：「你唔好搞到自己好似成個怨婦啦！」當成個熊家都覺得安仔成個港女無理取鬧嗰陣，安仔鬧爆發表「愛的宣言」話：「我同朱凌凌先係天長地久㗎！」

為咗重拾自己嘅地位，安仔更諗住宣示主權，買埋早餐搵朱凌凌，點知竟發現氹仔登堂入室，之後朱凌凌甚至帶埋氹仔上熊家食飯，嬲到安仔飯都唔食！而安仔再使出絕招，將過往同朱凌凌合拍嘅片剪輯成一段，希望喚起自己喺對方嘅地位，可惜最後發現自己為朱凌凌做的事都有人會為他做，令他心淡想放棄這段友誼，幸好最後朱凌凌透過一隻新Game同表明「心跡」，成功氹掂安仔！

雖然今集講嘅都只係兄弟情，但係安仔嘅表現勁HEHE，完全係一個女朋友呷醋嘅情況，唔少網民更大讚周嘉洛嘅演技再創高峰，做港女做到入型入格之餘，仲話佢嘅表情做得好到位，尤其係佢睇返同朱凌凌以前合拍嘅片段嗰陣，嗰個甜笑嘅冧樣畀網民笑言佢對朱凌凌唔止係「兄弟」咁簡單，另外喺安仔嬲緊朱凌凌期間知道對方上去佢屋企食飯，以為對方想同自己道歉，嗰個扮嬲但忍唔住嘴角含春嘅樣，表現得好自然！

同時網民直言今集HEHE味極濃，就算佢哋冇喺埋一齊都睇到勁心動，至於周嘉洛其中一句對白「菊花依舊，人面全非」更被網民視為神來之筆！

原文鏈接：http://www.orangenews.hk/officelady/system/2019/02/28/010111028.shtml