【識港網訊】《執法者們》自播出以來得到觀眾熱捧，近日（25日）於內地已突破3億播放量，成績斐然，一眾演員感激觀眾支持，其中馬國明期望可以開拍續集，讓三大男神再一次合體，創收視奇跡。

《執法者們》劇情已進入結局篇，劇中Big Boss已漸露真身，令觀眾睇得肉緊，以致播放量再創新高，馬明見證播放量不斷上升，感到好振奮：「好多謝觀眾咁鍾意呢個劇，真係好希望好希望公司可以原班人馬再開續集，同埋一個咁好嘅劇，希望香港可以盡快播出啦！」

黃宗澤（Bosco）認同三人合作確實有效果，但他有新建議：「希望樂小姐捉埋吳卓羲同林峯，五個一齊就更加好玩，但我相信都冇乜可能……哈，如果真係開續集，我希望啲打戲可以分勻啲，馬明要打、阿Mo（陳豪）又要打，唔好集中我一個。」

至於阿Mo非常感謝觀眾對劇集的支持，能夠得到3億播放量感覺是鼓舞的，好幸運能參與這次的製作，他說：「我都好期待能夠拍續集，畢竟第一次合作就能夠得到好成績，所以亦希望好成績可以延續落去。」

身為女主角的蔡潔，劇中被大姦角林嘉華槍殺身亡，蔡潔說：「近日好多粉絲話好希望我個角色何天茹可以復活，我叫大家集氣到3億播放量啦，可能都會再見到佢，估唔到咁快就3億，真係好開心，劇情好快就大結局，大家睇下會唔會願望成真。」